काठमाडौं : दैलेखको भैरवी गाउँपालिकामा जन्मिएर हाल निजामती सेवामा कार्यरत साहित्यकार ओम रिजालको दोस्रो उपन्यास ‘पैकेलो’ सार्वजनिक भएको छ। राजधानीको कालिकास्थानस्थित नेपालय आर्टमा आयोजित कार्यक्रममा साहित्य, संस्कृति र इतिहासप्रति अभिरुचि राख्ने विशिष्ट व्यक्तित्वहरूको उल्लेखनीय उपस्थिति रहेको थियो।
सामाजिक र सांस्कृतिक विषयलाई आख्यानमार्फत जीवन्त रूपमा प्रस्तुत गर्ने रिजालले यसअघि प्रकाशित ‘हटारु’ उपन्यासमार्फत नै आफ्नो सशक्त पहिचान स्थापित गरिसकेका छन्। सोही यात्राको निरन्तरता स्वरूप आएको ‘पैकेलो’ लाई उनको सिर्जनात्मक परिपक्वताको अर्को उचाइका रूपमा हेरिएको छ।
उपन्यास ‘पैकेलो’ मा नेपाली भाषाको जननीका रूपमा चिनिने खस भाषासँग जोडिएका ऐतिहासिक, सांस्कृतिक तथा धार्मिक परम्परा, जीवनशैली र सभ्यताको सूक्ष्म चित्रण गरिएको छ। गहिरो अध्ययन, अनुसन्धान, खोज र संकलनको आधारमा तयार गरिएको यस कृतिमा पुर्खाहरूको जीवनपद्धति, संस्कार र समयचेतनालाई सजीव रूपमा उतारिएको लेखकले बताएका छन्।
कार्यक्रममा बोल्ने वक्ताहरूले रिजालको लेखनलाई समाजशास्त्रीय र सांस्कृतिक अध्ययनको दृष्टिले महत्वपूर्ण उपलब्धि ठहर गर्दै ‘पैकेलो’ लाई साहित्य मात्र नभई इतिहास र पहिचानको दस्तावेजका रूपमा मूल्यांकन गरे। उनीहरूले उपन्यासले भाषा, संस्कृति र सभ्यताको संरक्षणमा समेत उल्लेखनीय योगदान पुर्याउने विश्वास व्यक्त गरे।
साहित्य, संगीत, इतिहास, संस्कृति, भाषा, पुरातत्त्व, समाजशास्त्र तथा मानवशास्त्रका विद्यार्थी र अध्येताका लागि यो कृति विशेष उपयोगी हुने धारणा पनि कार्यक्रममा व्यक्त गरिएको थियो।
यसअघि प्रकाशित ‘हटारु’ ले रिजालको साहित्यिक यात्रामा महत्वपूर्ण योगदान पुर्याएको सन्दर्भमा ‘पैकेलो’ लाई त्यसको समृद्ध विस्तारका रूपमा लिइएको छ।
कार्यक्रमको अन्त्यमा लेखक ओम रिजाललाई नयाँ कृतिका लागि हार्दिक बधाई ज्ञापन गर्दै आगामी दिनमा पनि यस्तै सिर्जनात्मक यात्राको निरन्तरताको कामना गरिएको थियो।
