निराज रानाभाट
काठमाडौं: पुष्प व्यवसायको व्यावसायिक विकास र प्रवर्द्धन गर्ने उद्देश्यले फ्लोरिकल्चर एशोसिएसन नेपाल (फ्यान) को आयोजनामा ‘२७ औँ फ्लोरा एक्स्पो–२०८२’ आयोजना हुने भएको छ। ‘स्वच्छ वातावरण, रोजगारी र आर्थिक समृद्धिका लागि पुष्प व्यवसाय’ भन्ने मूल नाराका साथ चैत ५ देखि ८ गतेसम्म काठमाडौंको भृकुटीमण्डपस्थित प्रदर्शनी हलमा एक्स्पो सञ्चालन हुने आयोजकले जनाएको छ। मेला बिहान ९ बजेदेखि साँझ ५:३० बजेसम्म खुला रहनेछ।
फ्यानका वरिष्ठ उपाध्यक्ष तथा मेलाका संयोजक रामबहादुर तामाङ (सुनिल) का अनुसार एक्स्पोमा व्यावसायिक ६५, अफिसियल ११, प्रतिस्पर्धा २, फूड २, ल्याण्डस्केप १, सेल्फी १ र बीवाइडी ईभी कार १ गरी कुल ८२ वटा स्टल रहनेछन्।
फ्यानका अध्यक्ष राजेश भक्त श्रेष्ठका अनुसार एक्स्पोमा करिब ५ सयभन्दा बढी प्रजातिका फूल, फलफूल तथा आलंकारिक इनडोर र आउटडोर बिरुवाहरू, सिरेमिक तथा प्लास्टिकका गमला, अर्गानिक मल, गार्डेनिङ र कौशी खेतीका सामग्री, उन्नत बिउबिजन तथा आधुनिक बगैंचा औजारबारे जानकारी, अवलोकन र खरिद गर्न सकिनेछ। साथै पुष्प व्यवसाय सुरु गर्न इच्छुक व्यक्तिहरूले विज्ञहरूबाट व्यावसायिक परामर्श समेत लिन सक्नेछन्।
एक्स्पोमा नर्सरी व्यवसायीहरूले उत्पादन गरेका गुणस्तरीय फूल तथा आलंकारिक बिरुवाहरूबीच प्रतिस्पर्धा समेत गराइनेछ। उत्कृष्ट स्टल, उत्कृष्ट ल्याण्डस्केपिङ, उत्कृष्ट मौसमी फूल, उत्कृष्ट आलंकारिक बिरुवा, उत्कृष्ट आलंकारिक फूल्ने बिरुवा, उत्कृष्ट पुष्प सजावट तथा उत्कृष्ट कट फ्लावर (गुलाब, जरबेरा र कार्नेशन) विधामा विजेतालाई शिल्ड, नगद र प्रमाणपत्र प्रदान गरिने आयोजकले जनाएको छ। सहभागी नर्सरी वा फर्मले तीन विधामा मात्र प्रतिस्पर्धा गर्न पाउने व्यवस्था गरिएको छ।
एक्स्पोमा पुष्प उत्पादक, थोक तथा खुद्रा व्यापारी, आयात–निर्यातकर्ता, सामग्री आपूर्तिकर्ता कम्पनी तथा उपभोक्ताको सक्रिय सहभागिता रहनेछ। मेलामा मौसमी फूल, फूल्ने तथा नफूल्ने आलंकारिक बोटबिरुवा, कट फ्लावर, ड्राइफ्लावर, सुनाखरी, कम्पोष्ट मल, बिउबिजन, ग्रीनहाउस, कृषि औजार, प्याकेजिङ सामग्री, थोपा सिँचाइ प्रविधि, जैविक विषादी तथा विभिन्न प्रकारका गमलासहित पुष्प सजावटका प्रदर्शनी तथा बिक्री कक्ष रहनेछन्।
साथै, फूल तथा बिरुवामा लाग्ने रोग–किरा सम्बन्धी समस्या समाधानका लागि बाली रोग विशेषज्ञहरूको टोलीसहित ‘प्लान्ट क्लिनिक’ सेवा पनि उपलब्ध गराइने आयोजकले जनाएको छ।
आयोजकका अनुसार एक्स्पोले पुष्प उद्यमी तथा व्यवसायीहरूलाई आफ्नो उत्पादन राष्ट्रिय स्तरमा प्रचार–प्रसार गरी बजार विस्तार गर्ने, नयाँ प्रविधि र उत्पादनबारे जानकारी आदानप्रदान गर्ने तथा उपभोक्तासँग प्रत्यक्ष सम्पर्क बढाउने अवसर प्रदान गर्नेछ।
फ्यानका अनुसार यस वर्षको एक्स्पोमा करिब ६० हजार अवलोकनकर्ता सहभागी हुने र १ करोड २० लाख रुपैयाँभन्दा बढीको व्यावसायिक कारोबार हुने अनुमान गरिएको छ।
