दशैंको खुसीमा प्रायः सबैको घरमा खसीको मासुका परिकार बनाइन्छ । तर फ्रिज नभएको अवस्थामा मासु बिग्रने सम्भावना बढी हुन्छ । त्यसैले नेपाली समाजमा लामो समयसम्म राख्न मिल्ने खसीको पक्कु बनाउने परम्परा पुरानो छ । यो सादा तर स्वादिलो परिकार हो जसलाई दशैं, तिहार वा कुनै पनि विशेष अवसरमा बनाउन सकिन्छ ।
आवश्यक सामग्री -१ किलो मासुको लागि)
खसीको मासु – १ किलो (ठूलो टुक्रा)
जीरा – २ चम्चा
धनियाँ – २ चम्चा
बेसार – १ चम्चा
रातो खुर्सानी धूलो – स्वादअनुसार
गरम मसाला – ½ चम्चा
तोरीको तेल – सानो एक कचौरा
ल्वाङ – ३/४ दाना
सुकुमेल – २/३ दाना
दालचिनी – १ सानो टुक्रा
तेजपत्ता – २ वटा
नून राख्ने हो भने तुरुन्त खाने पक्कुमा मात्र राख्नुहोस् । लामो समयसम्म राख्न नून नराख्नुहोस् ।
बनाउने तरिका
मसला तयार गर्ने:
जीरा र धनियाँ हल्का सुन्तलै रंग हुने गरी भुटेर पिस्नुहोस् । बजारको तयार धूलोभन्दा घरमै बनाएको ताजा मसला प्रयोग गर्दा स्वाद फरक हुन्छ ।
मासु मोल्ने:
खसीको मासुमा बेसार, भुटेको जीरा–धनियाँको धूलो, गरम मसाला, खुर्सानी धूलो र तोरीको तेल हालेर कम्तीमा ५ मिनेटसम्म राम्ररी मोल्नुहोस् ।
त्यसलाई छोपेर कम्तीमा १ घण्टा राख्नुहोस् ताकि मसला भित्रसम्म पसोस् ।
पकाउने:
कराइमा भन्दा कसौडीमा पक्कु अझै स्वादिलो बन्छ । तातो कसौडीमा मसला मोलिएको मासु राख्नुहोस् ।
बेला–बेलामा चलाउँदै मासुको पानी सुक्दासम्म पकाउनुहोस् ।
मसला थप्ने:
पानी सुकेर मासु रातो देखिन थालेपछि ल्वाङ, सुकुमेल, दालचिनी र तेजपत्ता हालेर राम्ररी चलाउनुहोस् ।
तेल छुट्टिन दिने:
मासु सुकेर तेल निस्किन थालेपछि ढकनी लगाएर मन्द आगोमा पकाउनुहोस् ।
बीच–बीचमा चलाइरहनुहोस् र अन्तिममा केही बेर नछोपी उमाल्न दिनुहोस् ।
अतिरिक्त टिप्स
यदि लामो समयसम्म राख्ने हो भने पक्कुलाई हावापानी नछिर्ने कन्टेनरमा राख्नुहोस् ।
ठुलो परिमाणमा पकाउँदा चिसो भएपछि मात्र कन्टेनरमा राख्नु उचित हुन्छ ।
पक्कु तातो भात, ढिंडो वा सेल रोटी सबैसँग मिल्छ ।
तोरीको तेलकै प्रयोग गर्दा पक्कु लामो समयसम्म स्वादिलो रहन्छ ।
