काठमाडौं:भीषण वर्षापछि आएको बाढीले नेपाल–चीनको व्यापारिक नाका मानिने मितेरी पुल पूर्णरूपमा बगाएको छ। रसुवाका प्रमुख जिल्ला अधिकारी अर्जुन पौडेलले रातभरको अविरल वर्षापछि आएको बाढीका कारण पुल बगाएको पुष्टि गर्दै नेपाल–चीनबीचको सिधा सडक सम्पर्क पूर्णरूपमा विच्छेद भएको जानकारी दिएका छन्।
रसुवागढी नाकानजिकको भन्सार यार्ड (ड्राइपोट) मा पार्क गरिएका १०० देखि १५० वटासम्मका सवारीसाधनमध्ये अधिकांश बाढीले बगाएको प्रारम्भिक जानकारी आएको छ। ती सवारीसाधनमा चीनबाट आयात गरिएका सामान लोड गरिएको आशंका गरिएको छ, जसले करोडौँको क्षति पुर्याउने अनुमान गरिएको छ।
प्रमुख जिल्ला अधिकारी पौडेलका अनुसार, ड्राइपोटमा कार्यरत केही ड्राइभर र मजदुरहरू पनि बाढीले बगाएको हुनसक्ने प्रारम्भिक सूचना प्राप्त भए पनि हालसम्म कोहीको मृत्यु वा बेपत्ताबारे पुष्टि भएको छैन। सुरक्षाकर्मी, स्थानीय प्रशासन तथा उद्धार टोली घटनास्थलतर्फ खटिसकेको छ।
उनले भने, “समग्रमा क्षति अत्यधिक छ। पुल बग्नुले व्यापारिक सम्पर्क मात्र होइन, रणनीतिक पहुँचसमेत प्रभावित भएको छ। अहिले घटनास्थलमा प्रहरी, सशस्त्र, नेपाली सेना तथा प्रशासनको टोली परिचालन गरेर क्षतिको विस्तृत विवरण संकलन गरिरहेका छौँ।”
यस बाढीले रसुवाको उत्तरगया गाउँपालिका–२ स्थित क्षेत्रमा सबैभन्दा बढी क्षति पुर्याएको जनाइएको छ। नदी आसपासका घर, पसल, गोदामलगायत संरचनाहरू पनि जोखिममा परेका छन्।
नेपाल–चीनबीचको प्रमुख नाका मानिने मितेरी पुल विगतमा पनि बाढीको उच्च जोखिममा रहँदै आएको थियो। तर यसपालिको बाढीले पूर्वाधारको कमजोरी र पूर्वतयारीको अभाव उजागर गरिदिएको छ।
प्रमुख बुँदाहरू:
रसुवागढीको मितेरी पुल पूर्ण रूपमा बगाएर नेपाल–चीन व्यापार अवरुद्ध
ड्राइपोटमा रहेका १००–१५० सवारीसाधनमध्ये अधिकांश बगाए
केही ड्राइभर र मजदुर बेपत्ता भएको आशंका
सुरक्षाकर्मी घटनास्थलमा खटिएका, क्षतिको विवरण संकलन जारी
करोडौँको भौतिक तथा व्यापारिक क्षतिको अनुमान
